Сёння, 30 лістапада 2016 года, стартаваў адборачны тур чытальнікаў беларускай паэзіі
(удзельніка чыталі тры творы: верш беларускага класіка, верш сучаснага беларускамоўнага паэта і верш сучаснага рускамоўнага паэта Беларусі).
У Доме літаратара мерапрыемства прайшло ў Мемарыяльнай зале. Першымі распачалі яго школьнікі з аб’яднання па інтарэсах «Журналістыка» Палаца дзяцей і моладзі «Золак», якім кірую, і выхаванцы Анатоля Зэкава — каму ж падтрымаць ініцыятыву СПБ, як не яго членам. І вершы гучалі — Янкі Купалы, Максіма Багдановіча, Рыгора Барадуліна, Алеся Ставера, і сучаснікаў — Анатоля Аўруціна, Лізаветы Палеес, Міколы Маляўкі, Юрася Нератка, Аліны Легастаевай, аўтара гэтых радкоў і інш.
Прыемна адзначыць, што толькі праслухваннем ды ацэнкаю чытацкага майстэрства справа не абмяжоўвалася — члены журы далі сапраўдны майстар-клас юным удзельнікам, акцэнтаваўшы ўвагу: вершы трэба чытаць душою, сэрцам.
Прызы атрымалі ўсе дэкламатары. Дзякуй за гэта кіраўніку Дэпартамента адукацыйных і інавацыйных праектаў Валянціне Дыніч.
Рыхтуем мы журналістаў ці будучых пісьменнікаў, наш абавязак зрабіць іх дасведчанымі ў літаратуры роднай краіны, багатымі духоўна, «прышчэпка» паэзіі, пакінутай у памяці, яўна не пашкодзіць.
Вольга Паўлючэнка, фота аўтара